تورکی نوحه لر

درکوفه

نیزه لر باشیندا کسوک باشون

شمع کاروانیمدی یا حسین

قوی غمونده پروانه تک یانوم

غم انیسِ جانیمدی یا حسین

ای فدای قرآن

سرور شهیدان

زینبم غمونده

آغلارام حسین جان

سن امیر اردوی عشق سن

قانلی تاج و افسر باشندادی

اشتیاق وصل و محبّتون

پیروان حیدر باشندادی

یدّی ضربتیله گوزل باشون

ذبح اولوب جدالر باشندادی

عاشقم سنه باغلانان قولوم

عشقیمه نشانیمدی یا حسین

ای فدای قرآن ...

همسفردی پوزقون قطاریله

دست بسته دردانه لر منه

خط سیریمی ائتمرم عوض

طعنه وورسا بیگانه لر منه

شمع حُسنده یانمیشام، یانار

بزمِ غمده پروانه لر منه

بارگاه بیدادی یاندران

آتشین زبانیمدی یا حسین

ای فدای قرآن ...

دلبریم ئورک مُلکنی گزوب

دلبران محبوبه ناز ایله

مرحبا مَلَکلَر دیر سنه

امتحاندا ایوبه ناز ایله

گوزلرون فداسی بو حُسنیله

یوسفِ بنِ یعقوبه ناز ایله

نازنین گولوم سن کیمی گوزل

یار دلستانیمدی یا حسین

ای فدای قرآن ...

یوسفیم بو بازار عشقیده

جان بکف خریداریوَم سنون

مشتری لرون نوبته دوروب

نازیوی چکن یاریوَم سنون

اقتدار عباسه آند اولا

کوفه ده علمداریوَم سنون

غم سپاهیمون پشتوانه سی

حیّ لامکانیمدی یا حسین

ای فدای قرآن ...

سندیرانماز اهل ستم منی

قانلی پرچمون آلمیشام اله

ایستورم بو پوزقون سپاهیله

من گئدوب سالام شامه ولوله

همّتیم گوروب شرمیدن ئوله

نوفل و سنان، شمر و حرمله

انقلابیوی سرفراز ائدن

قامت کمانیمدی یا حسین

ای فدای قرآن ...

نیزه لرده ای یار آشنا

هر دیاره گئتسن گلر باجون

دردمندیوم هر نگاهیوی

درد عشقه درمان بولر باجون

سویگلوم گوزون یومما باخ منه

باخماسان بو یولدا ئولر باجون

آغلا حالیمه قان توکن قوشون

یولدا پاسبانیمدی یا حسین

ای فدای قرآن ...

کلامی زنجانی

  منبع : تورکی نوحه لر - توحید قربانعلی زاده www.noohalar.blogfa.com

 کانال تلگرامی:turki_noohalar@