عاشقان حسین البشاره

استقبال از زائران حسینی

 

 عاشقان حسین البشاره

کربلانین عزاداری گلدی

دسته گُلّلر توکون رهگذاره

قبر شش گوشه زواری گلدی

 

مقدم سرو بستان مبارک

افتتاح گلستان مبارک

 

 اَسدی باد صبا گلستانه

ویردی ذوق صفا بوستانه

شهریمیز دوندی باغ جنانه

مژده اولسون هامی دوستانه

ویر خبر عشق اوتوندا یانانه

کربلا سسلیوب آغلیانه

تربت اقدس آستانه

زینت آرتیردی هر دودمانه

 

مقدم سرو بستان مبارک

افتتاح گلستان مبارک

 

 

 

 

 

 

باغلی یوللار آچیلدی قَضادن

گَلدی زوّاریمیز کربلادن

شرح ایدون بیزلره ماجرادن

آشنایه دیون آشنادن

نهر علقمده صاحب لوادن

قتلگهده اولان مُقتدادن

تل زینبده کی آه و وادن

خیمه گهده اولان وا اخادن

 

مقدم سرو بستان مبارک

افتتاح گلستان مبارک

 

 

 

 

 

 

یا حسین درگهونده گدایوخ

عاشقوخ عاشق کربلایوخ

دردمندوخ هامی بینوایوخ

بیز نه بیگانه یوخ آشنایوخ

لطف ایله بیزده اهل عزایوخ

اکبره اصغره بیز فدایوخ

دعوت ایله سنه باوفایوخ

مستحق سخا و عطایوخ

 

مقدم سرو بستان مبارک

افتتاح گلستان مبارک

 

 

 

 

 

 

کربلا سنده کی قانه قربان

توپراقوندا شهیدانه قربان

سنده کی جان جانانه قربان

اَنجُمه ماه تابانه قربان

باصفا صحن و ایوانه قربان

خوش طراوت گلستانه قربان

سود امر طفل عطشانه قربان

حلقده زخم پیکانه قربان

 

مقدم سرو بستان مبارک

افتتاح گلستان مبارک

بینوادور کریمی الهی

یوخ حسیندن صورا جان پناهی

قبره دلده گیدور سوز آهی

گورمه سه باصفا بارگاهی

اهل کین یاندیران خیمه گاهی

لخته قان دولدوران قتلگاهی

گرچه حدَّدن فزوندور گناهی

ائتمه شرمنده بو روسیاهی

 

مقدم سرو بستان مبارک

افتتاح گلستان مبارک

 

کریمی مراغه ای

    منبع : تورکی نوحه لر - توحید قربانعلی زاده www.noohalar.blogfa.com

شوقیله زوار حسینه باخون

استقبال از زائرین کربلا

 

شوقیله زوار حسینه باخون

محضر جانانه گئدوب گلدیلر

عالم معناده بو فرزانه لر

روضۀ رضوانه گئدوب گلدیلر

 

 

مدفن شش گوشه دی مد نظر

وار او حرمده نظر دادگر

دیدۀ حق بینیله باخسان اگر

محفل عرفانه گئدوب گلدیلر

 

 

اؤزلرینی سالدیلا گنجینیه

وئردیله رخصت دمِ دیرینیه

آغلادیلار ویردیلا چوخ سینیه

مجلس افغانه گئدوب گلدیلر

 

 

ای حرمی اهل ولایه مطاف

قبرین ائدر روح پیمبر طواف

عرض ائدرم اولماسا عرضیم خلاف

جنت یزدانه گئدوب گلدیلر

 

 

آغلادیلار اوردا شهِ بی سره

اصغره هم قاسمه هم اکبره

فیضه یتوب گوردوله خوش منظره

محضر سلطانه گئدوب گلدیلر

 

 

باشدان او یرده هامونی آتدیلار

نوحه دیوب آغلیوب آغلاتدیلار

دلده کی مقصوده گئدوب چاتدیلار

عارف مستانه گئدوب گلدیلر

 

 

گوردوله بیر بیر او شهین عزّتین

خوش حرمین دبدبه و شوکتین

صحن شریفین حرمین زینتین

ملک سلیمانه گئدوب گلدیلر

دکتر محمدحسین کتابچی (علومی تبریزی)

      منبع : تورکی نوحه لر - توحید قربانعلی زاده www.noohalar.blogfa.com

خوش گلوبسوز کربلادن کربلا مهمانلاری

 

استقبال از زائرین محترم کربلا

گریز به حضرت ابوالفضل (ع)

 

خوش گلوبسوز کربلادن کربلا مهمانلاری

مقدمیز اولسون گرامی نینوا مهمانلاری

باشیزه دونّوق حسینون باصفا مهمانلاری

گوردوز هاردا ذبح اولوب بیر بیر خدا مهمانلاری

اوردا باتدی قانه حقّین پُر بها مهمانلاری

 

 

گوردوز هاردا خیمه ویرمش سرور و سردار عشق

گوردوز هاردا گُلّنوبدی گلشن و گلزار عشق

گوردوز هاردا رایج اولموش دهریده بازار عشق

تا جهان واردی حسینون کربلاسی زنده دی

نهضت شاه شهیدان تا ابد پاینده دی

 

 

گوردوگوز کرب و بلاده توکدی زینب گوز یاشی

بیر گونون عرضینده ئولدی اوردا نچّه قارداشی

ذبح اولوندی پشت سردن اوردا شاهنشه باشی

تلّیدن زینب باخوبدی سسلیوب ای وای حسین

قالموسان تنها و یالقوز ای رسوله نور عین

 

 

بی کمک یالقوز قالان سلطانی گوردوز، گورمدوز

آلتی آیلیق صود امر قربانی گوردوز، گورمدوز

ظلم الیله تئز سولان ریحانی گوردوز، گورمدوز

سینه سینده ساخلیوب شه، شیرخواره اصغری

اوخلیوبدی حرمله اول ماهپاره اصغری

 

 

اوپدوگوز قبرین ایچینده اوچ گوزل دلبر یاتوب

اوردا مین دقّوز یوز الّی یاره لی پیکر یاتوب

عرشه بنزر قبریده اکبر یاتوب، اصغر یاتوب

سینه ی مولا حسینده اول بالا مدهوش اولوب

نازک حنجر اَنّی پیکانه او یرده توش اولوب

 

 

گوردوز هاردا قانه باتموش گُل جمالی اکبرین

زیر پاینده حسینون دفن اولوب اول بی قرین

جسمی اولموش قطعه قطعه اشبهه پیغمبرین

اکبره یاره وُروبلار اوردا آتدان سالدیلار

گُولدولر دشمنلری هی دورَه دَن اَل چالدیلار

 

 

ظلم ائوین ویران ائدن اسنادی گوردوز، گورمدوز

حجله گاه قاسم ناشادی گوردوز، گورمدوز

طوی حناسی قان اولان دامادی گوردوز، گورمدوز

مجتبی دلبندینون باخدوز قالان آثارینه

گُل الیزده گئتدوز آیا قاسمین دیدارینه؟

 

 

منشاء نورین گوروبسوز هاردادی مشعللری

فاطمه گلزارینون هاردا سولوبدی گُللری

هاردا بیر بیر آیریلوبدی تند عبّاس اللری

کیم گوروب اوُل یرلری رخصت ویروبدی اشکینه

گوردوز هاردا اوخ دگوب عبّاسین اول سو مشکینه؟

 

 

مشکی اوخلاندی همان یرده دایاندی گئتمدی

خیمه لرده تشنه قیزلاردان اوتاندی گئتمدی

تُپراق اوسته سو توکولدی قلبی یاندی گئتمدی

اوندا سسلندی حسین جان درک ایله مولا منی

حضرت زهرا گلوبدی گوزلیور قارداش سنی

 

 

فاطمه معجر الینده دیده سی گریان گلوب

باشیمه سایه سالوب بو مفخر نسوان گلوب

ایتماقا سنده زیارت تئز یتیش الان گلوب

گوزدن اشک غم توکور سسلور حسینی تئز چاغور

داده گَل قارداش حسین اخیامه گر چه غم یاغور

 

 

دردمندین «رضوی» مولا سنه دل باغلیوب

بزم ماتمده حسین جان ایندی بیر عمر آغلیوب

گرچه غملر گُوج گلوب بو دهریده دل داغلیوب

لطف ایله مولا الیندن دوت بو چوخ بیچاره دی

باخماسان گر هر ایکی دنیاده چون آواره دی

رضوی زنجانی

     منبع : تورکی نوحه لر - توحید قربانعلی زاده www.noohalar.blogfa.com