گل یولا سال حسینووی
وداع حضرت سیدالشهدا(ع)
گل یولا سال حسینووی
قانلی مینایه زینبیم
تلّیده قالما گیت باجی
خیمه سرایه زینبیم
آغلاما سینه داغلاما
جنته من مسافرم
داشلانا ذبح اولان باشیم
نیزه باشیندا حاضرم
قوی منی دوغراسین بولار
اکبر قهرمان کیمی
اوخ سینمی ستاره تک
دولدورا آسمان کیمی
آتلار ایاقلاسین منی
قاسم نوجوان کیمی
واردی نیازه شیعه نون
خاک شفایه زینبیم
من بو وصالی اقدسی
کل جهانه ویرمرم
وقریمی ویرسه لر منه
اَللی خزانه ویرمرم
گودی قتلگاهیمی
ملک جنانه ویرمرم
حاضر ایله اوشقلاری
بزم عزایه زینبیم
نیلیورم نفس چکم
ظلمت آشکاریده
بلبله سختیدور قالا
کنج قفس بهاریده
من گوره بیلمرم قالوب
عورت اوشاق فشاریده
ساکت اوتورماقیم سالار
خلقی بلایه زینبیم
تک بیله بیلمه من فقط
کرب و بلای ایسترم
غیرت و عشق و مقتلین
نسبتی واردی مین رقم
علت اودور کی قویجاقین
هر یره قارداشون قدم
گلدی دالیجا کربلا
سایه به سایه زینبیم
فاطمه گلسه بو گئجه
باش چکه غملی قیزلارا
قویما چوخ آغلاسین باجی
زلف محبتی دارا
ئوپ گویرن یوزین دینن
سن هارا کربلا هارا
بیرده کی قویمیون باخا
قانلی عبایه زینبیم
دوزدی بو کربلا باجی
گلشن جاودانیدور
گلشنی ساخلیان ولی
همت باغبانیدور
قویما باتا بو قانلاری
مسئله چوخ عیانیدور
واردی نیازه نهضتین
نطق رسایه زینبیم
فرض ایلمه بو نهضتین
قالماقی سهل و ساده دی
فرض ایلمه شریعتین
تکیه سی بو جهاده دی
راز بقا نهضتیم
سن کیمی مقتداده دی
نشر ایله حقّ مطلبی
آیه به آیه زینبیم
حاج حسین غفاری اردبیلی
منبع : تورکی نوحه لر - توحید قربانعلی زاده www.noohalar.blogfa.com
کانال تلگرامی:turki_noohalar@
لینک کانال کانال تلگرامی تورکی نوحه لر و ارتباط با ما: