مکالمه اباذر با سلمان راجع به محبت حضرت اباعبدالله الحسین علیه السلام

 

یازوبلا بیر گون اباذر اورکده درد نهان

او سرّی حل ایلسون گلدی محضر سلمان

 

خطاب قیلدی که ای پیرمرد نورانی

اورکده بیرجه سوزوم وار ولیک پنهانی

 

او سرّی من نجه نوعیله آشکار ایلیوم

ئوزوم کیمین سنی هم محنته دچار ایلیوم

 

او سوزون اوستنه آخر چکوم نجه پرده

چکنده پرده اوره گیم گلور منیم درده

 

بودور او سرّ ایدورم عرض ای رفیق شفیق

یقین ایلیه جکسن بو عرضیمی تصدیق

 

پیمبری که وجودی هامیدان اکرمدور

او شأنی جمله شئوناتدن معظّم دور

 

بلند مرتبه دور خاتم رسالتدور

عظیم شأنیدی بس واجب محبّتدور

 

کچنده ختم پیمبر اونون یرینده بلی

خدا یانیندا مقرّب اولان علیدور علی

 

اوچومجی فاطمه اوندان حسندی اوندان حسین

اورگیمی ایدورم هر زمان که مورد عین

 

گرک چوخ ایستیم اوّل پیمبری علنی

صورا علی صورا زهرا صورا امام حسنی

 

ولیک علّتینی بُلمم ای ستوده سیَر

هامودان آرتوق اوره گیم حسینی چوخ ایستر

 

ایشیتدی بو سوزی سلمان معدن ایمان

دیدی اباذره یاخشی بو سرّی ایتدون عیان

 

دیدون سوزی دیورم گیزلدم نه باکیم وار

بو باره ده سنه قلبیمده اشتراکیم وار

 

منیمده قلبیم حسینون آدی گلنده اَسَر

سنون کیمین بلی گوگلوم حسینی چوخ ایستر

 

گلوبله محضر زهراده با دل افکار

ایدوبله محضر زهرایه بو سوزی اظهار

 

خانم ایشیتدی بو سوز قلبنه ایدوب تاثیر

بیوردی یوخدی بو بابتده قلبوزه تقصیر

 

حسینون آدی گلن وقته تتریور اوره گیم

منیمده سیز تک حسینی چوخ ایستیور اوره گیم

 

گلوبله شیر خدا محضرینه افسرده

ایدوبله عرض حضورینه سرّی بی پرده

 

بیوردی مهر حسین نور تک هویدادور

اونون محبّتی قلبمده مثل دریادور

 

گلنده آدی هاچان اشگ چشم جاری دگول

اوره گیم ایستر حسینی بو اختیاری دگول

 

اولوبدی بسته حسینه بو رشته قلبیم

اوچار اونون طرفینه فرشته قلبیم

 

گلوبلر اوندا جناب رسول محضرینه

بو شرح عرض اولونوب دل ملول محضرینه

 

دولوبدی هر ایکی چشمینه آب پیغمبر

ویروب سوال لرینه جواب پیغمبر

 

ایا اباذر و سلمان دی مرد پاک ضمیر

حسینون آدی هامی قلبی ایلیوب تسخیر

 

حسین محبّتنه وار عوالم دیگر

زیاده قلبیم هامیدان حسینی چوخ ایستر

 

یتوب حضورینه جبریل اودم به امر اِله

سلامدن صورا عرض ایتدی یا رسول الله

 

بیوردی حضرت پروردگار عزّ و جلّ

هامیدان آرتوق حسینی من ایسترم اوّل

 

حسین،حسین،اولا روحیم فدا جلالتوه

نه ایتموسن هامی مشتاقدور محبّتوه

ــــــــــــــ

مرحوم مضطر اردبیلی

     منبع : تورکی نوحه لر - توحید قربانعلی زاده www.noohalar.blogfa.com