الله غریبم دربدر
راز و نیاز حضرت امام کاظم علیه السلام
الله غریبم دربدر
زندانیم خونین جگر
قالدی فراقیمده منیم
اون یدی قز ائوده ملر
جان سینمه گلدی خدا
گلمز ندن اوغلوم رضا
فکر سر و جان ائتمرم،حق اهلیم آزاده ام
باش اگمرم جانی لره،پیرم اگر افتاده ام
منهاج حقدن دونمرم،نسبتده حیدر زاده ام
آیات قرآنه اولوب،بو چرپنان قلبیم سپر
شیطان و شیطان سیرته،حاشا ائدم من بندگی
وار مرد حقّه کُنده و،زنجیرده ارزندگی
اللی بش ایل بو دهریده،ائتدیم شرفلن زندگی
شمع حیاتیم ایندی بو،محبسده ظلمیلن سونر
فرعون کیمی عصیان ائدوب،بغدادیده هارون دون
گوردوم که چوخ جهد ایلیور،اسلامی تا ائتسون زَبون
یثربده منده باشلادوم،تختین ائدم تا سرنگون
بیلدی خلافتدن دوشَر،آچدی منه دستِ خطر
ترسه مدار ائتدی منیم،آمالیمه بو چرخ پیر
قیلدی منی نخجیر تک،ظلمون کمندینده اسیر
ایللردی بو زندانیده،من تیره روزم دستگیر
دست جنایت پیشه دن،هِی سویلرم داد الحذر
آرام جانیم سلب ائدوب،بوینومدا سنگین سلسله
زندانِ جانفرساده من،یانام غمه گللم دیله
عبد مطیع خالقم،یوخ رنج عشقیمدن گله
من راضیم تقدیریمه،خالق رضا اولسا اگر
احیای اسلامه گوره،اهل و عیالی بوشلادیم
فیض حقه مشتاقیدیم،زندانی خلوت خوشلادیم
معبودیلن محبسده من،راز و نیازی خوشلادیم
عرض ایلدیم ائتدون کرم،اولدوم بو عشقه مفتخر
باتسون خدایا دهرده،ظُلّام بی ایمان آدی
مظلومی سرگردان ائدوب،ظلم ایلمکدن دویمادی
زنداندا من راحت قالام،سندابن شاهک قویمادی
پوزدی صفای عشقیمی،جلاد پست و خیره سر
خوشدور منیم آزاریمه،سند جسور و بی حیا
قوش تک قفسده اینجیدور،ائتمز منی الدن رها
هر گون گلر دیداریمه،ایلر اهانت ناروا
هی دل اوخیلان قلبیمه،نشتر ووروب شانشان ائدر
بوی مروّت بُلمیوب،باخماز نوا و زاریمه
درّنده خو وحشی صفت،اقدام ائدر آزاریمه
من ذکر منّان ایلرم،سیلی وورار رخساریمه
سنگین الی جان یاندیرار،شعله چکن اوددان بتر
یوخدور انیس و آشنا،غم سینه می تنگه سالوب
بیداد چنگال عسس،آرامیمی الدن آلوب
یثربده عزتلی قاپوم،مندن صورا باغلی قالوب
کان حیا اولادیمون،دوتماز سراقین بیر نفر
عزت چراغلاری سونوب،دوشدی بلایه باشلاری
هجریمده ایللردی منیم،قانه دونوب گوز یاشلاری
ائوده قالان قزلاریمون،غمدن آغاردی باشلاری
بو درد بی درمان منی،زندانیدن چوخ اینجیدر
یوخ ذره آسایشلری،جور و عناد و کینه دن
طغیان ائدوب دریا کیمی،باشدان آشوب درد و محن
قویمازلا اولسون بیر نفر،قزلاریما ائلچی گلن
کیم گلسه هارونِ دغا،ایلر اسیر و دربدر
داد آل ئوزون هارونیدن،ای ذات پاک ذوالمنن
بغض و عنادیلن اونون،قالدیم عجب غوغایه من
بخت ائوینه گوندرمدیم،شرمندیم معصومه دن
بو امره مهلت ویرمدی،هارون پست و فتنه گر
قیل بیر نظر بو محبس،جانکاهه ای قادر تاری
شامل ایله الطافووی،بو بندۀ حقه ساری
زنداندا جان اوسته منه،معصومه نی گوندر باری
هجران سوزوندن اوخشاسون،توکسون یوزه اشک بصر
ریحانۀ باغ حیا،وئرسون صفا بو مأمنه
گورسونله واردور همدمیم،گلسون حقارت دشمنه
ئولسم باشیم اوسته قزیم،بیر لاله یاندرسون منه
باتدی دیسون عزت گونوم،قالدیم یتیم و بی پدر
جان اوسته اولسون یاوریم،بیر دم او دخت مه لقا
من حقه جان تسلیم ائدیم،گیسون اودا رخت عزا
خوشدور قرا گونّی قزیم،تابوتیمه چکسون قرا
سالسون یولا باخسون دئسون،اولدوم نه یاخچی بختور
منبع : تورکی نوحه لر - توحید قربانعلی زاده www.noohalar.blogfa.com
لینک کانال کانال تلگرامی تورکی نوحه لر و ارتباط با ما: