ای یارالی باش کیمسن سرّ بیشمارون وار

دیر راهب
✔️ سوال و جواب

✔️ زبانحال راهب

ای یارالی باش کیمسن سرّ بیشمارون وار
گوزلرون باخار حسرت کیمدن انتظارون وار


چوللره دوشوبسن سن وار سنون نه تقصیرون
بو کسوک بوغازیله وار دوداقدا تقریرون
بُرجده ائشیتدیم من نیزه اوسته تکبیرون
حق دیوب دانشدون سن وار سوزونده تأثیرون
راز غیبه عیسادن آرتوق اقتدارون وار


باشوی دوشوب گورّم ظلم الیله بو حاله
صورتون باتوب قانه مثل قرمزی لاله
بیلمورم سالوب نعشون دشمنون نه احواله
نعشیوون عزاسینده ایلیور باشون ناله
یاش توکور گوزون هر دم حال سوگوارون وار


دشمنان روح الله داره چکدی عیسانی
یاره گورمدی سن تک جاری اولمادی قانی
کسدیلر قزل طشته رأس پاک یحیانی
نیزه ده اونون باشی گزمدی بیابانی
گورسنور سنون آرتوق خصم کینه دارون وار


مرد غیب سن لاشک نورِ آسمانی سن
نیزه ده نچه گوندور ائتموسن مکانی سن
یاغدیرورسان هر لحظه تازه تازه قانی سن
زنده سن نه که مرده جان جاودانی سن
کیم دیر سنده مرده خون روحدارون وار


قانلو لبلرون گورّم سویلیور انا المظلوم
گوز یاشون جمالونده ایلیور اونی مرقوم
باشوون یاراسیندان محنتون اولور معلوم
حق رضاسین آلنوندا قاندان ائتموسن مختوم
اهل امتحان ایچره رتبه افتخارون وار


گوزلریمدن آچدون سن بیر نگاهیلن پرده
درک قیلام الساعه اوز گوزیمله ظاهرده
ال ال اوسته صف چکمیش قدسیان برابرده
انبیا طواف ایلور باشوه همین یرده
ای وجود نورانی نوردن حصارون وار


✔️ جواب حضرت اباعبدالله الحسین علیه السلام


ای کشیش نصرانی آگه اول بو حالیمدن
حال انتظاریمدن علت ملالیمدن
انتظارم اطفال زار و خرد سالیمدن
دست بسته صحنونده بینوا عیالیمدن
آغلا حالیمه راهب چشم اشکبارون وار


کاف و نوندن صادر خلق ابتدایم من
داردن مسیحایه عرشه رهنمایم من
یا که حلق یحیاده جوش ائدن دمایم من
مصحف مسلماندا سرّ هل اتایم من
گور کیمم باخ انجیله قلب هوشیارون وار


هنده اوغلی بو ظلمی ائتدی روزگارینده
پیکریم قالوب عریان کربلا دیارینده
خردا قیزلاریم یاندی خیمه لر شرارینده
ئولدی یار و انصاریم تشنه سو کنارینده
بیر نفر نصارادن اوردا یادگارون وار


کوفه دن چخان گوندن بو بلالی طفلانی
وئرمیوبدولر منزل گزدیروبله صحرانی
بو گئجه قبول ایله زحمت غریبانی
دیرده قوناق ساخلا دختران زهرانی
ایندی که سنون الده منزل اختیارون وار


فرش وبستره هرگز سندن ائتمرم اصرار
زیر سقفده وئرسون باش باشا یتیم قیزلار
دامن کفالتده زینبیم اؤزی ساخلار
بو محبته وئرّم مژده ای وفا کردار
یوم حشر جنّتده قصر زرنگارون وار

مرحوم یحیوی اردبیلی

            منبع : تورکی نوحه لر - توحید قربانعلی زاده www.noohalar.blogfa.com

باغبان جانه دویار غنچه نی طوفان آپاراندا

⚫️زبانحال حضرت مولا علی (ع) در سوک حضرت زهرا (س)⚫️
 

باغبان جانه دویار غنچه نی طوفان آپاراندا

گوردی حیدر ئوزی دست اجلی جان آپاراندا

پشت درده خانمی فاطمه نی قان آپاراندا

دئدی سندردی عدو شهپر طاووسیمی الله

اللریم باغلیدی ئولدوردیله ناموسیمی الله....

سالدی ثانی نجه گور مهبط جبریله قیامت

قتلگاه اولدی بالام محسنه دربار عدالت

فاطمه غشّ ائلیوب منده قولی باغلی خجالت
 
گئتدی تاراجه حیاتیم نجه گور کینه سئلیندن
 
سویگولوم دوشدی نفسدن کیمی وار دوتسون الیندن...

گرد آلامه بو تقدیر قضادور بویانیدیم
 
پایه عهدیمی امکان یوخیدی ساده سانیدیم

کاش زهرا یرینه پشت دره من دایانیدیم

پر آچوب طایر جان چخسادا چخمشدی قفسدن
دلبریم فاطمه باری بئله دوشمزدی نفسدن.....

            منبع : تورکی نوحه لر - توحید قربانعلی زاده www.noohalar.blogfa.com

زینبیم ای وفا شعاریم

زبان حال خانم زهرا (س)به زینب کبرا(س)

زینبیم     ای      وفا      شعاریم
گل کیمی سولدی گل عذاریم
آزقالور    ترک     ائدم    جهانی
دلده    قالمور    داخی   قراریم

درگهیم دست ظلموله یاندی بالا
وحی ائوی اود دوتوب الولاندی بالا

قیزیم زینب      قیزیم زینب


فوج      غم     یتدی     مرتضایه
شیر         حق      فخر    اولیایه
یثرب   اهلی     جسارت ایتدی
یاور             ختم           الانبیایه

داندیلار   حقینی    قولون      باغلادیلار
محسنی اولدی سینه سین داغلادیلار

قیزیم زینب      قیزیم زینب


گلمه هجریمده چوخ فغانه
قویدی   آغلار سنی زمانه
صبر   ائله   فاطمه غمینده
ایتمه    اشگون  یوزه روانه

قویما غم لشگری سنی درده سالا
طاقت   و    صبروی     بیر آن  الدن آلا

قیزیم زینب        قیزیم زینب

دوت دله قارداشون حسینی
غملی     زهرایه     نور عینی
آغلاسا     عالمینی     یکسر
یاندیرار     شیونیله     شینی

صرصر  ظلمیله    سولار   یاسمنیم
قان اولار گوزلرینده اشگی حسنیم

قیزیم زینب       قیزیم زینب


کوچده      ثانی        ستمگر
یاندروب     دللری     سراسر
ویردی  سیلی قباله  اوسته
عدنیده        آغلادی     پیمبر

واریری خون دل   سرشگیله آخا
یاندیرا    نار     غم شراریله  یاخا


قیزیم زینب      قیزیم زینب

برگ گل نیش خاره دگدی
دست کین گلعذاره دگدی
پاره   پاره     اولوب    قباله
یاره لی   قلبه   یاره دگدی

باشیمون  محنتین یازار اهل قلم
نوکریمدی (جوانی) سن ایله کرم

قیزیم زینب       قیزیم زینب

            منبع : تورکی نوحه لر - توحید قربانعلی زاده www.noohalar.blogfa.com

چکون قاره کوچه بازاره

استقبال از ایام فاطمیه


چکون قاره کوچه بازاره
ای عزادران گلدی ایام فاطمیه
علینون ئولدوردیلر یارین
قالدی سرگردان گلدی ایام فاطمیه

فدک گلزاری دوتوب ماتم
زینب و کلثوم
اولدی آواره
ظلم ثانیدن
قانیلن دولدی جام زهرا

ئورکلر حالی اولوب برهم
قلبیلر یاندی
ناله قوزاندی
عرش رحمانه
دیللره دوشدی نام زهرا

اوجالدی فریاد یا زهرا
آغ کفن گیدی
دخت پیغمبر
وای مدینه

جوان ئولدی بینوا زهرا
بختینه باخدی
آغلادی حیدر
وای مدینه





آچیلدی تا اودلانان درگه
سوزدی قان بیردن
آخدی آیات و مُنزل اوسته
حسین گریان مجتبی گریان
گوللر آشفته باغبان اما مغسل اوسته

نماز مستانه سين قیلدی
بال و پر آچدی
اوچدی افلاکه
اهل عرش و لاهوت ایچینده

گجه یاری ائودن آیریلدی
مهربان دلبر
یاره لی مادر
خانۀ قبره
عازم اولدی تابوت ایچینده

اوجالدی فریاد یا زهرا
آغ کفن گیدی
دخت پیغمبر
وای مدینه

جوان ئولدی بینوا زهرا
بختینه باخدی
آغلادی حیدر
وای مدینه

وفا منافی اردبیلی

            منبع : تورکی نوحه لر - توحید قربانعلی زاده www.noohalar.blogfa.com

ای عزا بزملرین گرم ایلین عاشقلر

ایام فاطمیه

ای عزا بزملرین گرم ایلین عاشقلر
اهلبیتین آدینا قاره گیین عاشقلر
اولیا امرینه لبیک دیین عاشقلر
قاره زی مدرک ائدین الده دئیون یازهرا
گرم ائدین مجلسی اوّلده دئیون یازهرا


فاطمه آدی گلن مجلسه شرکت ائلیین
قاره پرچمدن ئوپون قبرینه نیّت ائلیین
شرطی وار هر عملین یعنی رعایت ائلیین
مجلسین صاحبی اثباتیلن اشخاصه باخار
نه قرا کوینگوه، قلبیده اخلاصه باخار


بولمورم گلمیسیز ئوز عهدیزه ایفا ائده سیز
یا اورک حاجتیزه عرض تمنا ائده سیز
یا کی ساکت اوتوروب خالی تماشا ائده سیز
وار امیدیم سوزی سوزیله جدا ایله ماقا
مطلبین حقینی مجلسده ادا ایله ماقا


منده یوخ ظرف بیان عرض ائلیم زهرادن
شعریلن مدح یازام مادر عاشورادن
قطره ده واردی نه قدرت دانیشا دریادن
هر پیمبر الینه معجزه لر لازمه دی
مصطفی مکتبینین معجزه سی فاطمه دی


بِالیَقین فاطمه سیز جلوه ی خلقت یوخودی
نه پیمبر یوخودی امّت وعترت یوخودی
کعبه و حلّ حرم حشریده جنت یوخودی
ذات حق ماخلقین مشکلین آسان ائلدی
جنتی فاطمه نین حقّینه احسان ائلدی


فاطمه بانیِ احساندی عنایت ایلیر
انحرافه گئدنی نوری هدایت ایلیر
سیئات بشره لطفی کفایت ایلیر
باخما درگاهی یانان ظلم وجنایت گونونه
درجاتین تانیماق قالدی قیامت گونونه


آچ بصیرت گوزووی دوشمویه مطلب دوگونه
قلبیدن ایله نظر اویما گوزون گوردوگونه
گور مصادفدی بو گونلر نه زمانه نه گونه
بومجالس کی او ایام غمه نسبتی وار
اکثراً سیلی و ثانی و ستم صحبتی وار


در و دیواریله مسمار مگر ائتدی نلر
نجه مسمار، سوزی سینه نی اوخ مثلی دلر
هانکی مجلسده اوخونسا خود زهراده گلر
قاپینین یانماسی تا که قیزاریب مسماری
باتدی بیر نقطیه کی فاش ائلدی اسراری


قاپی دالسیندا اگر حامله عورت سیخیلا
ایله سه سقط جنین اولماسا ممکن یخیلا
تازه نوزادینه دلدن چالیشار چاره قیلا
فضّه گل ناله سی زنگ خطر اولدی قاپیدا
مصطفی نین زحماتی هدر اولدی قاپیدا


بوزمان فضّه نین آیا ندور عکس العملی
گوردی مسماریده قان، تیتردی زانوسی الی
فضّه نیده سسینه چاتدی او اثناده علی
گوردی درگاهینه اوچ یوز نفرعدوان توکولوب
آختاریب فاطمه نی گوردی یره قان توکولوب


لحن اخطاریله تا ائتدی مخاطب عمری
مرد جنگ اولسان اگر یوخ عملینده اثری
کیم توکوب بیر نفرین باشینه اوچ یوز نفری
مدعی اولسان اگر مکتب پیغمبرده
قاپی آچماق نیه اورگنمه میسن خیبرده


ننگیدور عالم مردانه لیقا بوعملین
غیرتین اولسا اگر عاجزه قوزانماز الین
جهلدور فکر و توانائی و بحث و جدلین
حرم رحمته نامحرمی دولدورمازلار
قاپییا ائوده مریض اولسا تپیک ویرمازلار

واصف مرندی

            منبع : تورکی نوحه لر - توحید قربانعلی زاده www.noohalar.blogfa.com

رحلت ایلیوب دار فانیدن

نوحه مناسب روز شهادت حضرت زهرا (س)


رحلت ایلیوب دار فانیدن
بنت خاتم الانبیا بوگون
باشینه وورار زینب حزین
گوز یاشی توکرمجتبا بوگون

«آغلوری شه کربلا بوگون»


شیعه لر بو گون آغلیون هامی
دخترِ شه انبیایه سیز
گوز یاشی توکوب تسلیت ویرون
صاحب عزا لافتایه سیز
بیرده میوۀ قلب مصطفی
زهریله ئولن مجتبایه سیز
قان اولوب گوزینده سرشک تر
آغلوری شه کربلا بوگون


سسلدی اودم گل عم اوغلی جان
ایلیوم سنه بیر وصیتی
جان سنون اولا جان حسینیمین
بیرده کسمه مندن سن اُلفتی
مجتبا حسن اوغلوما اوزون
قیل عم اوغلی هرآن محبتی
عترتیم هامی باشیم اوسته دور
آغلوری منه اولیا بوگون


دوقوزایل سنه همدم اولموشام
گورمدیم اذّیت بیر آنیده
زلفلریم آغاردی عم اوغلی جان
محنت رسول گرامیده
چوخدی حسرتیم قلبیده منیم
آیریلوق یتوب بو زمانیده
یاری یاریدن ایلدی جدا
درک ایدور اجل برملا بو گون


غسلیمی منیم ویرعم اوغلی جان
دفن قیل گیجه ثانی بُلمسون
جسمیمه دگن تازیانه لر
آشکاراولوب کیمسه گورمسون
گیزلین ایله سن قبریمی منیم
قبریم اوستونه تا که گلمسون
روحیمی معذّب ایدر منیم
گلسه لر اگراشقیا بو گون


راضی اولمارام ای عم اوغلی جان
ثانی قبریمین اوستینه گله
یاندوران زمان باب رحمتی
سالدی گوگلره شور و ولوله
وار نشانه سی تازیانه نین
جسمیده بو گون گیتمیوب هله
وامصیبتا سویلدی یقین
روح اشرف انبیا بوگون


زینبا قیزیم آغلاما منه
ساخلا گوزیاشین کربلایه سن
شمردون حسین باشینی کسر
صبر قیل او دم هربلایه سن
باشینی وورار نیزیه سنان
گوش قیل کلام خدایه سن
نیزه ده اوخورکهف آیه سین
میوۀ دل مصطفا بوگون


جدّیمین او قبر مطهّرین
قسمت ائت خدا منده تا گلم
ایلیم زیارت او مرقدی
آغلیام او دم نالیه گلم
دلده بو«ثریایه» ورددور
گوزده گوزیاشی با غم و الم
سویلرم نولور قبر پاکیوه
جمع اولا بو اهل عزا بوگون

مرحوم ثریا تبریزی

            منبع : تورکی نوحه لر - توحید قربانعلی زاده www.noohalar.blogfa.com

زبانحال حضرت علی(ع) بر سر مزار حضرت زهرا(س) بعد از دفن

زبانحال حضرت علی(ع) بر سر مزار حضرت زهرا(س) بعد از دفن

اونداکی زهرانی دفن ایتدی امیر مومنان
اگلشوب قبرین کنارینده بیله ایتدی بیان

شاه بیت :
هر قدر جانیمده وار جان آغلارام زهرا سنه
گوز یاشیم قورتولسا گر قان آغلارام زهرا سنه


عالمی ترک ایلدون سن کامه یتدی دشمنین
گوئیا قالموش قولاقیمده فغان و شیونین
اگلشن گوزیاشلی قبراسته عم اوغلوندورسنین
شوریله هرلحظه هران آغلارام زهرا سنه


چکدیقون غملردوشوریاده اولورقلبیم کباب
قان اولان قلبیمده قالمورطاقت و آرام و تاب
سسلورم هرقدرویرمورسن منه زهرا جواب
قالدیم آخرخانه ویران آغلارام زهرا سنه


توکماقا قان یاش یانان دلدن اجازه آلموشام
شعله آهیمله لرزه نه قبابه سالموشام
دورایاقه فاطمه من ایمدی یالقوزقالموشام
اولموشام بیحدپریشان آغلارام زهرا سنه


بیله فرض ایتمه عم اوغلون داد و شیوندن دویار
کسوت صبرو دوامی جسم زاریندن سویار
اوزالیله عاشق اوزمحبوبه سین قبره قویار
قالموشام واللهی حیران آغلارام زهرا سنه


غسلیوی ایمدی ویرنده یانموشام دلدن امان
گورموشم قولاریوی اشگیم اولوب گوزدن روان
ایلمیشدون بو نچه مدت نجه مندن نهان
تاوارام چیخمازیادیمدان آغلارام زهرا سنه


خوش گلورآیا بو محنت کردگارذوالمنه
گیتدون استیفای حق استنده داردشمنه
بازگشتینده آچاندا ظلم الین ثانی سنه
کاش اولیدی کونی ویران آغلارام زهرا سنه


غم الینده بو جهاندا تیره اولدی گوندوزون
وار یری قبرونده ده قان آغلاسا آغلارگوزون
دور گیداق آخر حسینی ایتگلن آرام اوزون
فرقتونده ایلور افغان آغلارام زهرا سنه


قبرین اوسته دورموشام نسگلرین یاد ایتماقا
صبر سرحدین گوزوم یاشیله بر باد ایتماقا
اوز ایوینده قویمادی دشمن سنی داد ایتماقا
آغلادون چوللرده هر آن آغلارام زهرا سنه


قورخورام من بینوانی درد هجرانون یورا
چوخ قالام دنیاده چوخ عمر ایلیم سندن صورا
نیلمیشدون سن مگر ثانی سنه سیلی وورا
یوخ سوزیمده جای نقصان آغلارام زهرا سنه


شوق قبر شاه مردان باشیمه دوشموش گینه
لطف قیل بیرده خدا «حامد» گیده پابوسینه
بو سوزی ذکرایلیه بالای سرده گوشینه
هر قدر جانیمده وارجان آغلارام زهرا سنه

مرحوم حامد تبریزی

            منبع : تورکی نوحه لر - توحید قربانعلی زاده www.noohalar.blogfa.com

گوزلرین گوزومده باخوب منه

زبانحال حضرت زهرا (س)

گوزلرین گوزومده باخوب منه
توکمه اشگ حسرت عم اوغلی جان
گل اوتور کناریمده ایلیوم
بیر نچه وصیت عم اوغلی جان


آز زمان سنون میهمانیوام
من بو ایوده ای شان و شوکتیم
دل رضا دگول غملی گویلوه
بوندان آرتوق اولسون مصیبتیم
دردسردی بو قالماقیم سنه
قوی گیدیم آزالسون اذیتیم
بسدی ئوز غمون عالمه ایدر
بیر غمون کفایت عم اوغلی جان


چوخدی نیسگیلیم بیر به بیر دیسم
هربیری نهان درد اولار سنه
گرچه محرم رازیسن اوزون  
باخبر سن هر ظلم دشمنه
غسل ایدنده معلوم اولار سنه
ثانی نیلیوب کوچه ده منه
ناخوشام او گوندن یتوب منه
بیر آغیر مصیبت عم اوغلی جان


کیم بولور اوگون کوچه ده  نجه
ظلم ناروادن اوسانموشام
منزله ساری وای دیه دیه
گاهی یول گیدیب گه دایانموشام
هم قبالم الدن گیدیب اوگون
هم دویولموشم هم اوتانموشام
گوردی نور دیدم حسن نجه
چکمیشم خجالت عم اوغلی جان


غم دیزونده باشین عذاریوه
حسرتیله گوز یاشی باغلاما
من دوزنمورم سینه داغلیسان
من سنه فدا سینه داغلاما
آغلیاندا سن زینب آغلیری
هم حسن حسین آغلیر آغلاما
نیلیوم اورک دردیمه منیم
اولمادی طبابت عم اوغلی جان


بیرده قوی بو آخر دقیقه ده
داغلی سینمی داغلیوم گیدیم
بیر ده قوی باخوم گول جمالیوه
عمر دفترین باغلیوم گیدیم
قوی بو پوزقون احوالیوه سنون
بیر دویونجا من آغلیوم گیدیم
قبر ایوینده ده غملی گویلومی
یاندیرار بو حسرت عم اوغلی جان

            منبع : تورکی نوحه لر - توحید قربانعلی زاده www.noohalar.blogfa.com

ای منیم یار مهربانیم

زبانحال حضرت علی ( ع )

         ای  منیم    یار         مهربانیم
         مرتضی    تکدی   یاتما   زهرا
        دور عم اوغلون قالوب آدامسیز
        حیدری   گوزدن   آتما     زهرا
آز منیم  ،  قلبیمی   آلیشدیر     یارالی
حیدرون  ، گویلون آل دانیشدیر یارالی
        غریبم من       غریبم من(٢)



       ای  مه  بی قرینه     یاتما
       آبروی     مدینه       یاتما
       گیجه یاری  سو ایستنده
       کیم ویرر سو حسینه یاتما
گوزلرون ، لکه   قانی   یاندیردی   منی
سینه وون ، یاره سی  اوتاندیردی منی
      غریبم من     غریبم من(٢)   



        آچ گوزون ای سحاب رحمت
        زینبون    قلبی  قاندی زهرا
        دور  ایاقه حسینی  دیندیر
        گورنجه    ناگراندی   زهرا
قیزلارون ، آب  و  دانه  ایستر  یارالی
زینبون  ،  زلفی   شانه  ایستر  یارالی
      غریبم من    غریبم من(٢)



        آچ گوزون  مرتضانی دیندیر
        آزمنیم    قلبیمی    آلیشدیر
        کوسموسن    روزگار الیندن
        لا اقل      زینبی    دانشدیر
کوچه نون  ،ماجراسی آغلاتدی    منی
یثربون، اهلی چوخ  اوجوز ساتدی منی
      غریبم من     غریبم من(٢)



        مجتبادن  ائشیتدیم  الآن
        کوچه نون غملی ماجراسین
        تیتریور   اللریم      باغیشلا
        باغلورام سینه وون یاراسین
آغلارام  ، قبره نیمه شب گیتمه گیوه
سینه وون ،یاره سین نهان ایتمه گیوه
      غریبم من    غریبم  من(٢)



        اللریم    باغلی اولماسیدی
         یثربی  قانه    دوندرردیم
         باشینی    ثانی    پلیدین
        من ابوبکره     گوندرردیم
باغلیوب  ،  ختم الانبیا     قولاریمی
ووردولار  ،  آلدیلار الیمدن  واریمی
      غریبم من    غریبم من(٢)

مرتضی اسکندری (ساعد زنجانی)

            منبع : تورکی نوحه لر - توحید قربانعلی زاده www.noohalar.blogfa.com

قارداش یخلدیم گل هرایه،،باخ سجده گاهیمده یارایه

استمداد قمربنی هاشم«ع»


قارداش یخلدیم گل هرایه،،باخ سجده گاهیمده یارایه
       گل هرایه، اؤلورم من
قارداش دوشوب شیرین کمنده،، السیز قالوب جلاد الینده
       باخ بلایه،،اؤلورم من

       هرنه یارا دگدی دایاندوم--ای برادر ای برادر
سو مشکیمه اوخ دگدی یاندوم--ای برادر ای برادر



تز گلمه سن داده برادر،،اون یدّی جلاد الده خنجر
       گئت گل ایلور باشیم اوسته
جرأت تاپوب نیزه ویرانلار،،اوّلده میداندان قاچانلار
         جمع اوللولار دسته دسته

آل باشیمی آغوشه قارداش--جان زینب جان زینب
توکمه بئله رخساره قانیاش--جان زینب جان زینب



نوفل منی تا گوردی السیز،،ویردی آغیر ضربه خبرسیز
     گوزلریمه دولدی القان
باش کاسه سی اولدی شکسته،،آهن عمودیله سو اوسته
         شرمسار اولدوم حسینجان
 
آتدان یخلدوم تشنه شاها--یابن حیدر یابن حیدر
آلدی منی آغوشه زهرا--یابن حیدر یابن حیدر



زهرا منی آغوشه آلدی،،لای لای چالوب دردیمی آلدی
     گوزلریم قالدی گوزونده
یاندیم آلیشدیم من دوباره،،گوردوم قولوندا کاری یاره
      ردّ سیلی گول یوزونده

بو غم منی یاندیردی یاخدی--جان زینب جان زینب
خجلت تری آنلیمدان آخیدی--جان زینب جان زینب

✍️مجید قلعه بیگی (فقیرخویی)
            منبع : تورکی نوحه لر - توحید قربانعلی زاده www.noohalar.blogfa.com

ئولور غملی آنون ای دردیمه درمان ابالفضل

زبانحال حضرت ام البنین (س)

ئولور غملی آنون ای دردیمه درمان ابالفضل
چیخور خسته بدنن بو یورولان جان اباالفضل

گل ای ماه منور
وئرور جان غملی مادر
سنون هجرون ائدوبدی
یانان قلبی مکدر

گل ای نور عین
مه عالمین
قالوبدی یولدا گوزلر

غلام حسین
مه عالمین
قالوبدی یولدا گوزلر

ائدوب درد فراقون قلب زاری قان ابالفضل
اولا جان دوعالم آدوه قربان ابالفضل

منیم ای قهرمانیم
شجاعتلی جوانیم
سنی یاده سالاندا
آخور اشک روانیم

آنون خسته دی
سفراوسته دی
گوزوم نوری تز

چاتوبدی اجل
حسینیله گل
منه آغلیان یوخ

گوزوم یولدا قولاقیم سسده هاردا قالموسان گل
منی سن درد جانسوزفراقه سالموسان گل
 
گل ای ماه مدینه
دولوبدی غمله سینه
اوزون قولارون اولدی
ستون دین مبینه

آدوا فدا
اولوم آی بالا
باشیمی چوخ اوجاتدون

سن ای باوفا
یل کربلا
باشیمی چوخ اوجاتدون

ائشیتدیم لشگر کینه یولون اوسته دوروبلار
جانیم چیخسین بالا شهلا گوزونن اوخ وئروبلار

نجه من آغلامیوم
سینمی داغلامیوم
جماله اشک ماتم
نجه من باغلامیوم

وجودیم یانور
اورک اودلانور
گل ای نوردیده

گوزوم باغلانور
سینم داغلانور
گل ای نور دیده

رمضانی (خاکی)

            منبع : تورکی نوحه لر - توحید قربانعلی زاده www.noohalar.blogfa.com

مسکن ایلردی بقیعی گون قباقیندا مدام

احوالات حضرت ام البنین(س)_ورود به مدینه

______________________________  
                                                     
                      بخش 2

 مسکن ایلردی بقیعی گون قباقیندا مدام
چون فرات اشکین توکردی بانوی علیا مقام


کوچه دن هر کیمی گیچن وقته ایشیتسِیدی سسین
تاب ایدنمزدی، اوجالداردی فغان و ناله سین


والی یثرب که مروان جفا کرداریدی
مبغض شیرخدا و عترت اطهاریدی


بو عداوتله تعجّبدور او بی ایمانیدن
اول دنی بیر گون گیچوردی جنب قبرستانیدن


گوردی قبرستانیدن بیر سس گلور آرام آلور
کوچه دن هر کیم گیچور تاثیری قلبین پارچالور


سویلدی بو آغلیان کیمدور بیله فریاد  ایدور
دوست و دشمن صبرینون سرحدّینی برباد ایدور


اول زنازاده ایدن ساعت بو طرزیله سوال
بیر نفر ویردی جواب ای والی عالی جلال


آغلیان بوردا ایدن صبح و مسا داد و انین
مادر عبّاسیدور، زوج علی، امّ البنین


اول زنازاده تاسّف قیلدی ایتدی آه و زار
بیر بیره ووردی الین، سسلندی الحق حقّی وار


خلق ایدندن عالم امکانی واللهی خدا
گورمیوب چشم جهان عبّاس تک صاحب وفا


خلق ایده مین بیله عالم گر خدای کائنات
مثل و مانندی ابوالفضلین گله هیهات هات


بو قراریله اُلونجه ایتدی آه و شور و شین
گاه ذکرین وا ابوالفضلا ایدوب گه وا حسین

آغلاماق سرحدّین عمرونجه بو خاتون یخمادی
گولمدی بیر گون یوزی، خاطردن اصلاً چخمادی


اوچ نفرده بو خانم تک جان ویرونجه آغلادی
چخمادی خاطردن آغلار گوزلی سینه داغلادی


بیر علی اکبر آناسی بینوا لیلائیدی
دلده وردی وای اوغول وای، ذکر واویلائیدی


اکبرین طوی حجله گاهینده او بیچاره خانم
ساچلاری الده یوزون سورتردی دیواره خانم


سسلنوردی باشیمه سنسیز قرا سالدیم اوغول
ای عجب سندنصورا دنیاده من قالدیم اوغول


کاش سن نوش ایلین ساعت اجل پیمانه سین
درک ایدِیدی پیک رحلت بو بلا همخانه سین


ای گل اوزلوم گل کیمی باتدون لب عطشان قانه سن
ایلدون مجنون کیمی بو لیلینی دیوانه سن


نوجوانی هر کیمون اُلسه اوغول وای دور سوزی
کیم گوروب گولسون بو دنیاده اوغولسوزلار یوزی


بیرده خاطردن اُلونجه چخمادی عفّت مآب
اصغرین بی کس آناسی معدن عصمت رباب


گون قباقینده گیدوب هر گون آچاردی اوز باشین
وای حسینیم وای دیوب جاری ایدردی گوزیاشین


حالی ایلردی خواتین حرمدن سلب تاب
حالینه محزون اولوب سویلردیلر اولدون کباب


کولگه یرلرده خانم اگلش فغان و داد ایله
گون قباقینده آز اگلش ناله و فریاد ایله


اگلشوم سویلردی آخِر کولگه یرلرده نجه
گون قباقینده حسینیم قالدی اوچ گون اوچ گجه


اوز گوزومله اول شهین گوردوم من عریان پیکرین
بی کفن، عریان، یارالی، قانه غلطان پیکرین


هرقدر ایتسم بو خاتونین وفاسیندن رقم
آخِره یتمز قالار تحریریدن عاجز قلم


جانینی جانانی شاه کربلادن سیچمدی
جان ویرونجه آغلادی، اصلاً سرین سو ایچمه دی

سو گورنده دلدن ایلردی فغان و شور و شین
سسلنوردی سو کنارینده سوسوز اُلدی حسین


شیرخواره بیر اوشاق گورسیدی ایلردی فغان
سسلنوردی وای علی اصغر اُلیدی کاش آنان


            منبع : تورکی نوحه لر - توحید قربانعلی زاده www.noohalar.blogfa.com

بخش1: کاروان شام ایدوب چون شهر یثربده مقام

احوالات حضرت ام البنین(س)_ورود به مدینه
_______________________________  
                                                     
                         بخش 1

کاروان شام ایدوب چون شهر یثربده مقام
ماجرای کربلا کشف اولدی بولدی خاصّ و عالم


حضرت عبّاس آناسی فاطمه امّ البنین
هر صباح و شام ایدردی ناله و داد و انین


سیل اشکیله ایدردی خانه ی صبرین خراب
یثربین عورتلرینه بیله ایلردی خطاب


ای مدینه اهلی بسدور دلده کی دردیم منیم
اولمیون راضی سماواته اوجالسون شیونیم


دردیمی آرتورمیون بسدور بو فریاد و انین
ایتمیوب هرگز مخاطب سیز منی امّ البنین


ایلینده سیز منه امّ البنین آدی خطاب

قان اولان گوگلومده قالمور طاقت و آرام و تاب


گوزلریمده ایلوری جلوه عزیز جانلاریم

یادیمه لابد دوشور جاندان گیچن اوغلانلاریم


واریدی دورت اوغلوم، آل حیدره منظوریدیم
افتخاریم واریدی امّ البنین مشهوریدیم


باشیمه دورت قاره امّا ایمدی بیردن سالموشام
ورد و ذکریم وای اوغول وای دور، اوغولسوز قالموشام


سیز منه بوندان صورا امّ البنین ایتمون خطاب
نه یوزیله سسلینده من ویروم بیرده جواب


هر کیمون اولسا نچه اوغلی جوان نازنین
رسمیدور اعراب اونون آدین قویار امّ البنین


سیز منیم بوندان صورا آدیمی یالقوز سسلیون
رخت قاره، سینه سی داغلی، اوغولسوز سسلیون


کاسه ی چشمیم نجه قانیله آیا دولماسون
زینبیم بیر سوز دیور اصلی اونون کاش اولماسون


ایلوری بیله روایت اول عزیزه محترم
ایلیوبلر اوغلومون سو اوسته قولّارین قلم


تا حیاتیم وار سزادور آغلیام من صبح و شام
اُلدوروبدور اوغلومی دشت بلاده اهل شام


ای مدینه اهلی بیله من ایشیتدیم بو سوزی
تیریله نابود اولوب اوغلوم ابوالفضلین گوزی


من ایشیتدیم کربلاده ظلمیله قوم عنود
آخِر عمرینده باشیندان ووروبلار بیر عمود


من ایشیتدیم اُلدوروبلر تشنه سردار اوغلومی
سرو تک قولسوز یخوب اشرار علمدار اوغلومی


من ایشیتدیم اهل کین ظلمینده طغیان ایلیوب
اوغلوم عبّاسی سو اوسته تیره باران ایلیوب


مین نفر دعواده اولسا افسر صاحب هنر
رسم دعوادور علمداری گوزتلر دسته لر


چون علمدار اُلسه سلطان حالی ایلر انکسار
ال تاپار دشمن علم یاتسا، هامی لشکر سینار


تابینون نعشینه دگمزلر بولون بو مطلبی
یخسالار آتدان ولی دوغرالّا صاحب منصبی

آه او ساعتدن او صاحب منصب اردوی شاه
صدر زین اوستن یخلدی، جراته گلدی سپاه


قلب فوج لشکر شامه زبس قویموشدی داغ
تیغ تیز الده هامی عبّاسی ایلردی سراغ


هر گلن بیر یاره ووردی آلدی اوندان انتقام
قالمادی سالم قاریشدی بیر بیره لحم و عظام


گوردولر بیر پرشکسته قوش کیمی جسمین خموش
ایتدیلر بی رحم لر صد پاره جسمین نیزه پوش

اوغلوم عبّاسین یارالی جسمین اعدا سویدولار
چون سپه سالاریدی یرلرده عریان قویدولار

باش سینوب، قولّار گیدوب، بیرق یاتوب، مشک اوخلانوب
اوغلوم عبّاسین وجودی قطعه قطعه دوغرانوب


اوج ایدوب اوغلوم حسینون عرشه واویلاسی
حشره دین قان آغلادور بو ماجرا من بی کسی


شرح حال حضرت امّ البنین اولماز تمام
هم حسینه هم ابوالفضله یاناردی صبح و شام

حضرت عبّاس چرخ عزّته بیر ماهیدی
نجم تالی اول مهه اوغلی عبید اللهیدی


گونده اول طفلین الی الده خانم امّ البنین
یوز قویاردی سمت قبرستانه محزون و غمین

ادامه.....
            منبع : تورکی نوحه لر - توحید قربانعلی زاده www.noohalar.blogfa.com

جان اوسته دی ام البنین

زبانحال حضرت ام البنین (س)


جان اوسته دی ام البنین
ایوای دیینیم اولمادی
یارب نیه دورت اوغلومدان
یاسه گلنیم اولمادی

کاش عونیله فضلیم گلیدی
اولاد با فضلیم گلیدی
قالدی گوزوم یوللاردا الله
قولسوز ابوالفضلیم گلیدی
ام البنینم بی بنینم




عقدیم اوخونان گونومدن
زهرایه کنیز اولدوم من
زینب الینی ئوپندن
دنیایه عزیز اولدوم من

صرافیمه الماسی وئردیم
بو باغه قربان یاسی وئردیم
فخریله شاه مشرقینه
نوکرلیقه عباسی وئردیم
ام البنینم بی بنینم




عباسیم اگر گلسیدی
بو گوزلریمی باغلاردی
یاسیمده اورک داغلاردی
نوحه اوخیوب آغلاردی

امدادیمه اما گلن یوخ
یاسیمده افغان ایلین یوخ
جانیم چیخور بی یار و یولداش
زهرا کیمی دردیم بولن یوخ
ام البنینم بی بنینم




بیر عمریدی من آغلورام
تندن کسیلن قوللاره
جان اوسته یم آغلیان یوخ
حسرت باخورام یوللاره

دوزدی بویوتدوم دورت خزینه
وئردیم فدا قرآن و دینه
عباسیدن وار انتظاریم
تا باش چکه ام البنینه
ام البنینم بی بنینم




بیر عمریدی اوغلون منه
 بایراملاری یولداش اولموش
وار بیر محنیم قلبیمده
نیسگیللریمه باش اولموش

ظلمیله غم جامی ایچیلمیش
زینب دیور جسمون بیچیلمیش
اوخ نیزه ویرموشلار او قدری
اول سرویلی قامت کیچیلمیش
ام البنینم بی بنینم

رامین محمدزاده(پریشان)

       منبع : تورکی نوحه لر - توحید قربانعلی زاده www.noohalar.blogfa.com

حجّت بن الحسن جان زهرا

یا مهدی

حجّت بن الحسن جان زهرا
قیل عنایت بو عشاقه مولا
شیعه لر دردینه سن دواسن
یادگار شه کربلاسن


کعبه دن ظاهر اول ای سواره
امّتین حالینه قیل نظاره
باخ بو یاران چشم انتظاره
درد هجرانه سن آشناسن
یادگار شه کربلاسن


باشیمیز تاجی ای نازدانه
وار سنه عشقیمیز صادقانه
ویرمروخ بیر توکون مین جهانه
سن عزیز حق کبریاسن
یادگار شه کربلاسن


گون کیمی سن تجلّایه گلدون
آسمان تولّایه گلدون
ماه شعباندا دنیایه گلدون
نرجسین عمرونه سن صفاسن
یادگار شه کربلاسن


سن ولیّ حق لامکان سان
ظلمی محکوم ایدن قهرمانسان
رهبر انقلاب جهانسان
خسته عاشقلره رهنماسن
یادگار شه کربلاسن


گلمسن قلبمیز راحت اولماز
اهل اسلام آرا وحدت اولماز
گل آقا بیر بیله فرقت اولماز
هارداسان سن که کان وفاسن
یادگار شه کربلاسن


ای گوزللر صفنده سرآمد
راحت جان آل محمّد
حق سنی ایلیوبدی مویّد
علت خلقت ماسواسن
یادگار شه کربلاسن


تز ظهور ایله ای جان جانان
قالماسون یرده خون شهیدان
لاله تک داغلانان قلبه قربان
آغلوسان ایندی صبح و مساسن
یادگار شه کربلاسن


حق ظهوره ویرنده اجازه
کعبه دن عزم ایدرسن حجازه
فاطمیّون چخار پیشوازه
سن که دلبند خیرالنّسا سن
یادگار شه کربلاسن

کلامی_زنجانی
       منبع : تورکی نوحه لر - توحید قربانعلی زاده www.noohalar.blogfa.com

خامه الیمده ایستیور عنوان غم یازا

احوالات حضرت ام البنین مرحوم انور اردبیلی

خامه الیمده ایستیور عنوان غم یازا
مطلب اوزانمیا سوزی کوتاه و کم یازا

مبهوتیدور مقدمه نی باشلاسون نجه
یا که سوزون گریزینی هانسی رقم یازا

یوخدور لیاقتیم بیلورم نوحه یازماقا
لایق سوزی بلی گرک اهل قلم یازا

شاعر گرک مطالبینه چوخ دقیق اولا
وجدانین ایلیه سوزه نسبت حَکَم یازا

گوز یاشینه گوره دئمیه ناروا سخن
آل اللهی نظرده دوتا محترم یازا

الحق گرکدی شاه شهیدون مصیبتین
نظم عالمینده مقبلیله محتشم یازا

اما حسین کریمیدی قووماز گلنلرین
فکر ائتمورم که سهو ائده نی مُتَّهم یازا

ئوز ساربانینی یولا بوش سالمیان حسین
نه عیبی وار مُحِبَّه برات کرم یازا

واردور امیدیمیز گله عباس مجلسه
آمار اهل مجلسی صاحب علم یازا

عباس آدین گتوردی قلم کاغذ اوستونه
ام البنین محنتینی لاجرم یازا

غم شعله سینده غصّه لی پروانه تک یانوب
دورد داغی واردی قلبیده دورد اوغلی دوغرانوب

خاک بقیعده قلبه مؤثر مزاری وار
نه سایه بانی وار نه اقلاً حصاری وار

مونس اولار همیشه اوغولسوز اوغولسوزا
اوغلی ئولن رباب کیمی همجواری وار

مین اوچ یوز ایل او قبریده بیر شمع یانمیوب
ظالم جماعتون نقدر گور فشاری وار

قویموللا قویسالار چوخ اولار قبرینی ئوپن
عباس آناسیدور هامونون انتظاری وار

گیزلین گلور اوزاقدا دورور مؤمنه زنان
نزدیک اولا او قبره کیمون اختیاری وار

گیسولرین یولور او مزاره آتور چوخی
اهل محبتون بیله لر اعتباری وار

شمشیر چکمیوب نقدر صاحب الزمان
نسل امیّه نون هله خوش روزگاری وار

خوشدور وئرک بو بزم مصیبتده باش باشا
اولسون ثبوت شیعه لرین حق شعاری وار

ام البنین حسینه گوره هر ندن گئچوب
کرب و بلا چولونده نچه یادگاری وار

ام البنین ، حسینینه عباس بسلیوب
عباسی بسلین آنانون افتخاری وار

دورد اوغلونا دیردی همیشه او خوش مرام
هر دوردوزی حسینیمه من وئرموشم غلام

زینبدن ائتدی کرب وبلا صحنه سین سؤال
شعله چکن زماندا قزیم آتش قتال

عباس حسینه ائتدی نه اندازه ده کمک
تعریف ائله گوروم نقدر ایلدی جدال

هئچ کیمسه روبرو اولا بیلمزدی اوغلوما
دگسون یارا قاباقدان اونا امردور محال

گیزلتمه صحبت ایله نیستان سوزون منه
اوردا ائشیتمیشم بالاما یوز وئروب ملال

زینب دئدی آنا سوزی واضح دینمرم
واضح دئسم اولار سنیچون مایۀ خیال

وار حقی بوینوموزدا اباالفضلووون آنا
ایمنده ساخلامیشدی بیزی اول وفا خصال

نهر فراتی آلدی حسین سیز سو ایچمدی
ائتسون بلند مرتبه سین حی ذوالجلال

راضیدی گوزلرین وئره مشکینده سو قالا
افسوس کوفه اهلی اونا وئرمدی مجال

ام البنین درک ایلینده بو صحبتی
احسن دئدی اوغول صودیمی ایلدیم حلال

سندن باجون رضایت ائدور منده راضیم
یاخشی اوغول ائدر آنانی صاحب جلال




قوی یثرب اهلی شهریده یالقوز دئسون منه
دشمنلریم گورنده اوغولسوز دئسون منه

تا زنده ام شهامتووه آغلارام سنون
صبح و مسا دیانتووه آغلارام سنون

محرابووه دوشنده گوزوم موقع نماز
تکبیریوه عبادتووه آغلارام سنون

قرآن صداسی گلسه هر ائوده قولاقیمه
خوش لحنووه تلاوتیوه آغلارام سنون

یاندیرمارام چراغیمی وقت غروبیده
باشسیز قالان عمارتیوه آغلارام سنون

گورسم بیرین شجاعتیله مرکبین چاپور
یاده سالوب شجاعتیوه آغلارام سنون

سقالری گورنده گوزوم اللرینده جام
سو اوسته که قیامتیوه آغلارام سنون

سایه سالان زمانیده گلزاره سرولر
یانام کشیده قامتیوه آغلارام سنون

شرمنده یاتموسان بالاجا قبریده اوغول
سو گورجگین خجالتیوه آغلارام سنون

هر بیر یارالینون یاراسین باغلاسا طبیب
باغلانمیان جراحتیوه آغلارام سنون

آللام قوجاقه اوغلووی گول مثلی ایگلرم
تاپشوردوقون امانتیوه آغلارام سنون

واردور لیاقتی منه تخفیف درد اولا
رشد ایلسه ئوزون کیمی آزاد مرد اولا

واردور علاقه سی اولا سقا سنون کیمی
سو پایلیا سوسوزلارا حتی سنون کیمی

گوگلوم سو ایستینده دورور جام آلور اله
سو ایلیور بفوری مهیا سنون کیمی

گاهی دیور آنا من علمدار اولام گرک
چوخ عشقی واردی پرچمه گویا سنون کیمی

یاده دوشور باخاندا بونا ئوز اوشاقلیقون
بی مثلدرو بو گوهر یکتا سنون کیمی

شیر خدا نوه سی دی هئچ قورخی بیلمیور
یوخدور بو شیر بچیه پروا سنون کیمی

حتی یریشده ده ئوزوزه اوخشیوب بالون
خوش یول گیدور بو قامت رعنا سنون کیمی

وقت نماز اولاندا یرونده نماز ائدور
ذکری اولوبدی ربّی الاعلا سنون کیمی

مشتاقیم بو صحبت ائده منده جان دیم
اخلاقدور وجودی سراپا سنون کیمی

الله ئوزی بو طفلی پناهنده ساخلاسون
ائتسون غلام عترت طاها سنون کیمی

روشن ائدر چراغیمی گر قویسا بدنظر
مونس اولار منه بو دل آرا سنون کیمی

هر سوز دئسه یره بالامون سالمارام سوزون
دوشسه سوزی یره بی بی سی ئولدورر ئوزون

مرحوم انور

       منبع : تورکی نوحه لر - توحید قربانعلی زاده www.noohalar.blogfa.com

بیرده خطاب ائتمیون امّ البنین منه

زبانحال حضرت ام البنین(س)


بیرده خطاب ائتمیون امّ البنین منه
اوغلانلاریم ئولوبدی بو اولدی یقین منه

عبّاس و عون و جعفر و فضلین وجودینه
وئرمیشدی بو کنیتی حَبل المتین منه

معلوم اولور ئولوبله او نورس جوانلاریم
اولسون گرک انیس ئولنجه اَنین منه

دورت اوغلومی سوسوز یتوروبله شهادته
ماتم سرا اولوبدی بو روی زمین منه

هر دوردینون غمی اثرایلر منه ولی
عبّاسیمین او حالی اولوب دلنشین منه

ایوای منه دیولَّه سو اوسته دوشوب قولی
بیرده محال خوش گله یاد معین منه

ایلوب خسوف برج بنی هاشمون آئی
تیره ائدوب بو عالمی اول مه جبین منه

قطعه بقطعه دوغرانوب اعضاسی اوغلومون
بیرده قرار و صبر دل اولسون چتین منه

اوغلوم ئولوب یاتوب علمی مشکی اوخلانوب
ارسال ائدوبله قانه باتان پرچمین منه

هل من معین دیوبدی اولاردان صورا حسین
ایلر اثر ئولنجه او هل من معین منه

تا وار حیاتیم آغلارام ابر بهار تک
بیت الحزن جهانی ائدوب اهل کین منه

صد شکر اولا امامه اولار جان نثار اولوب
اوغلانلاریمدی ،ال ، گوز، امام مبین منه

صدمه گوزه گلنده ائدر دفع شر ال
تعلیم ائدوب بونی شه عرش آستین منه

دین اوسته جان ویروبدیله حقّیم حلال اولا
ائتموشدی کشف بو سوزی سالار دین منه

من «زایرم» یوخومدی لیاقت بو سوزلره
الهام ائدوبدی حضرت روح الامین منه

خالقدن ایسترم شب و روزی بو جمعیله
ائتسون نصیب بیر اولارین مدفنین منه

مرحوم زایر تبریزی

ای مدینه عورتلری گلوب هر گجه گونوز داده آغلارام

زبانحال حضرت ام البنین(س)

ای مدینه عورتلری گلوب هر گجه گونوز داده آغلارام

سو یانیندا لب تشنه جان ویرن اوغلومی سالوب یاده آغلارام

وار یری اگر عالمه تمام اودلی آهیمیله شرر سالام

نه روادی که گلشنیم سولا ظلم الیله آخِر ملر قالام

وای منه دیولّر جفائیله کربلاده دوغراندی شیر بالام

یادیمه سالوب بیر به بیر غمین نی کیمی گلوب داده آغلارام

اُلدورنده عبّاسیمی عدو کربلاده صد حیف اولمادیم

غصّه دن خزان یپراقی کیمی شاخه ی مصیبتده سولمادیم

باش آچوب آنالار کیمی اونون نعشی اوسته من زلف یولمادیم

اود وورار فراق آتشی هر آن بو دل و بو اکباده آغلارام

نار حسرت ازبسکه اود وورار بو یانان دل و جسم و جانیمه

باخبر اولان یوخدی بیر نفر دلده کی بو سرّ نهانیمه

آغلارام سزادی بیر عمر قان تشنه جان ویرن نوجوانیمه

شاد اولام چتین بیرده یوز گوله، تا وارام بو دنیاده آغلارام

اوغلونون عزاسینده آغلاماق گرچه هر آنانین سزاسیدور

لیک اولوم ابوالفضلیمه فدا آغلادان منی بیر وفاسیدور

افتخار امّ البنیندور، دورت بالام حسینین فداسیدور

خدمتیله ایلوبدیلر منی سربلند عقباده آغلارام

بیر گورون بو بی کس آناسینون قلبیده نه اندازه صبری وار

سرّی واردی گوزیاشلی دیده مین بیله بارش همچو ابری وار

کربلا مسافرلری دیور اوغلومون گوزل خوردا قبری وار

یادیمه دوشور خوردا مرقدی صبر دل گیدور باده آغلارام

خدمتین حسینه تمام ایدوب دلده کی اولان مقصده چاتوب

ایله سرو قامتلی بیر بالام خوردا قبر ایچینده نجه یاتوب

اولمادیم او چولده گورنمدیم هاردا او درخشان مهیم یاتوب

فکر ایدنده حالین غم و محن یوز ویرر بوناشاده آغلارام

کربلاده زینب بیله دیور بیر مهمّ جنگ اتّفاق دوشوب

اوغلومون اولوب قولّاری قلم، صاق قولی صولوندان قاباق دوشوب

بولمورم ندور سرّی بس اونون قبری قارداشیندان اوزاق دوشوب

تا بدنده روحیم نه قدری وار جور و ظلم بیداده آغلارام

گرچه منله عبّاس آراسینا سالدی بو فلک حسرت وصال

یوخدی چاره امّا دوزم گرک، دوزماقیمدا بیر امردور محال

چونکه روسفید ایلیوب منی امدیقی سودی ایلدیم حلال

باشیمی اوجالدوبدی تا صاقام من اونا هر اثناده آغلارام

ساعیا تمام ایت گیلن سوزون طول ویرمه چوخدا کلامه سن

سوز یازاندا آز یاز ولی قوتار ویر همین کلامه ادامه سن

اولسا دلده هر نه  حوائجون عرض قیل شه تشنه کامه سن

دی واریمدی بیر درد قلبیده من او درده اخفاده آغلارام

حاج_غلامرضا (ساعی )

       منبع : تورکی نوحه لر - توحید قربانعلی زاده www.noohalar.blogfa.com

ای شاه گلگون کفن دور باجون گیدیر حسین

✅احوالات کوچ از قتلگاه✅

ای شاه گلگون کفن دور باجون گیدیر حسین

یوخدور سنی دفن ائدن،دور باجون گیدیر حسین

       اول سوسوز لبلره لبلریم فدا حسین

     قان دولان گوزلره گوزلریم فدا حسین

          یاحسین یاحسین من سنه فدا حسین(2)

 

شمر ستمگر بیزی باغلویوبدی قول قولا

سنسیز بیزی گوندرور شامِ شومه ای اخا

وادور یری بو چمن ناله صوتیله دولا

داغیلمیش جسمی گورن باش آچا اوزون ویرا

     وار گلایم بو چرخ و بو روزگاریدن

      شیرزن زینبی سالدی اعتباریدن

عریان قالوب پیکرون یوخ بو جسمه سایبان

قویموللا دفن ایلویم نعشیوی بو کوفیان

باشون اللرده گزیر شهریارِ انس و جان

سانجیلوب اوخ اوسته اوخ آچ گوزون حسین اویان

     دور حسین ماتم و غصه دن باجون اؤلور

آغلورام من سنه کوفیان منه گولور

یاندیردی قارداش منی پوزدی نیزه یاره سی

بیرده ربابین سوسوز طفل ماه پاره سی

اللرده اؤلدی اونون تشنه شیرخواره سی

غارتده دوشدی اله،اصغرین گهواره سی

    بیرنفر یوخ دئسین ویرمیون اوشاقلاری

     آبله باغلیوب قیزلارون ایاقلاری

هاردا قالوب اکبرین، هاردا میر لشگرین

اوخ اوسته اوخ سانجیلوب پاره لندی پیکرون

قانیله پرده چکوب بوسه گاه مادرین

خیردا بارماغین هانی، کیمده دی انگشترین

      صف چکوب اشقیا نیزه داش آتوردولار

    پیکر پاکون اوستونده آت چاپوردولار

سن لبیکی سسلدون قلبیدن شهادته

منده اورکدن اخا راضیم اسارته

اولسون قسم ذوالفقار شه ولایته

زینب دوزر داغ کیمی هر غم و مصیبته

      بو آخان قانلاری من گرک حسین آلام

    شامیده تختیدن  هندین اوغلونی سالام

مجید قلعه بیگی «فقیرخویی»

       منبع : تورکی نوحه لر - توحید قربانعلی زاده www.noohalar.blogfa.com

منیم ای نازلی دلداریم، منیم ای دردیمه درمان

یا مهدی

منیم ای نازلی دلداریم، منیم ای دردیمه درمان

منیم ای دولتیم، واریم، باغیشلا، گئچ گناهیمدان

 

سالاندا سن منی بنده، یاخینلیق اولماسا سنده

اگر قانیمی توکسنده، یولومدان دونمرم بیر آن

 

شیریندیر لبلرین دلبر، او گول رخسارینی گوستر

یازیق کونلوم سنی ایستر، منی الدن سالیر هجران

 

جمالین پرده یه سالما، بو عاشیقدن اوزاق قالما

گوزومدن انتقام آلما، منی قویما بئله حیران

 

بدخشان لعلی سنسن یار، اوزون یاقوت کیمی پارلار

سنون حسنونده دیر گلزار، جمالیندیر نگارستان

 

منیمچون لیلی، عمر انسان، و یا بلقیس و صنعانسان

یادا بیر ماه کنعانسان، سنه اولسون جانیم قوربان

 

منی سن مجنون ائتمیش سن، حیاتدا محزون ائتمیش سن

اوزونه مفتون ائتمیش سن، ائدیبسن قلبیمی بریان

 

دئییردیم من سنین یارین؟ کی اولدوم ایندی بیمارین

سنین نورانی رخسارین، منی یاندیردی، ای جانان

 

«نظامی» اولدو بیچاره، ائدیب هجرانین آواره

تاپیلمیر دردینه چاره، اولوب جاری گوزوندن قان

ــــــــــــــــــــ

حکیم نظامی گنجوی

        منبع : تورکی نوحه لر - توحید قربانعلی زاده www.noohalar.blogfa.com

شهید بالام گوزل بالام ناز بالام

زبانحال مادران معظم شهدا

 

شهید بالام گوزل بالام ناز بالام

ئوز دینینه شرفلی سرباز بالام

یوخوما گلمه سون گلمه سوزوم یوخ

بهشتیدن منه نامه یاز بالام

 

 

شهید بالام گوزلریم قربان سنه

آدون شرف ویریب بیزیم وطنه

ایکاش ننون ئولیدی سن ئولونجه

سن قبریمون اوسته دِیدون وای ننه

 

 

محرّملیک گلوب هاردا قالوبسان

هانسی داغین اوسته قانا باتوبسان

همیشه من سنه کوینک آلاردیم

اولما ئوزون قرا کوینک آلوبسان

 

 

نماز قیلان اوروج دوتان نور بالام

جنازووه شهر اهلی آغلور بالام

اوغلی ئولن فقط بیلر دردیمی

ئوزون منی زهرایه تاپشور بالام

 

 

شهید بالام ننون قربان بویووا

گویرچینیم هاردا سالوبسان یووا

خانم لیلا بیلر منیم حالیمی

چاغیرمادیم تای توشووی طویووا

 

 

آقام حسین سنه نگهدار اولسون

مزارونده گلوب سنه یار اولسون

اَلین چکسین یارالارون ساغالسین

دیوم آقا سنون اَلون وار اولسون

 

 

سنی اوغلوم قربان ویردیم اکبره

قالدی بیزیم گوروشوموز محشره

دعا ایله منده گلیم یانووا

آند ویرّم سنی علی اصغره

 

 

خانم لیلا گوزوم قربان نه چکدون

گوردون بالون ویریبدی جان نه چکدون

قاباق زمان من بیلمزدیم بو دردی

اودلاندی قلبیم الامان نه چکدون

حاج حسین غفاری اردبیلی

        منبع : تورکی نوحه لر - توحید قربانعلی زاده www.noohalar.blogfa.com