تورکی نوحه لر

خطاب به سرزمین کربلا

خوش حالیوه ای کربلا

                  زیبا رواقون وار

یتمیش ایکی جاندان گئچن

                  عالی قوناقون وار

فردوس اعلادن گوزل اول آستانونده

خوش رنگ و خوش بو گوللرین وار گلستانونده

بیت خداونده برابر اول مکانونده

پیر و جوان و صود امر عالی قوناقون وار

مجنون ائدوب عاشقلری اول قبر شش گوشه

هر عاشق ایستر دلبرین بیر آلسون آغوشه

اول مرقد شش گوشه دن اخذ ایلسون توشه

حدَّن زیاده عاشق پر اشتیاقون وار

هر آن تجلّی ایلیور نور صفا سنده

اول زینت مرو و صفا خیف و منا سنده

مدفون اولوبدور خامس آل عبا سنده

بیر نوگل نشکفته دن آیا سراغون وار؟

خوش حالیوه سرچشمۀ آب بقا سنده

صحرانی رنگین ایلین خون خدا سنده

اللر حنالی دفن اولان نوگدخدا سنده

عُشّاقینی قان آغلادان بیر طوی اطاقون وار

لیلانی مجنون ایلدی زیبا جمال اکبر

شش گوشه قبر ایچره یاتوب اول شبه پیغمبر

هم شاه دین هم نوجوان هم صود امر اصغر

شه سینه سینده غنچه تک سولموش دوداقون وار

قولسوز دوشنده ساحله سقّای مظلومان

دریا دگوبدور بیر بیره اولدی عجب طوفان

فریاد ائدوب آغلاشدیلار طفلان لب عطشان

ای وای عجب اهل ستم اهل نفاقون وار

مرحوم خالق فکری اردبیلی

  منبع : تورکی نوحه لر - توحید قربانعلی زاده www.noohalar.blogfa.com