تورکی نوحه لر

زبانحال حضرت مسلم علیه السلام

اولسون سفیرون جانوه قربان عم اوغلی

اولدوم یولوندا قانیمه غلطان عم اوغلی

گلمه حسینجان کوفه نون یوخدور صفاسی

خوش گلمدی سردارووه غملی هواسی

قلبیم مثالی قان وئرور باشیم یاراسی

یوخدور یارالی جسمیمه درمان عم اوغلی

کول بامیلردن باشیمه از بس توکولدی

سیندی وقاریم یاحسین قدیم بوکولدی

بیر نیزه دگدی سینمه سینم سوکولدی

اولدوم کوله ،سرنیزیه مهمان عم اوغلی

ئوز میهمانین ئولدورر مردان کوفه

تنگ اولدی فرماندارووه میدان کوفه

گویا کی دعوتسیز گلوب مهمان کوفه

غمدن اولوب قلبیم منیم شان شان عم اوغلی

آغلار منیم احوالیمه چشم خزانلار

خندق قازوبلارکوچه ده دعوت یازانلار

داش دولدوروبلار دامنه خندق قازانلار

یوخدور بولاردا گوئیا وجدان عم اوغلی

قلبیم سینوبدی یاحسین پیمانه لر تک

یاندیم آلیشدیم غصه دن پروانه لر تک

آواره قالدیم کوچه ده بیگانه لر تک

اولدی بو دنیا مسلمه زندان عم اوغلی

سینم کیمی قلبیم اولوب غمدن یارالی

دشمن ایچینده بیکسم حیدر مثالی

اوغلانلاریمدان کوفه ده دوشدوم آرالی

اوخدان بتر دور محنت هجران عم اوغلی

آیریلما بیر لحظه وفالی لشکروندن

چوخ ناگرانم باشرافت اکبروندن

گلسون مواظب اول علی اصغروندن

آماده دور هر طفله مین پیکان عم اوغلی

حاج حسین غفاری اردبیلی

   منبع : تورکی نوحه لر - توحید قربانعلی زاده www.noohalar.blogfa.com