✅ درد دل با بقیة الله«عج»

اجتماعی_انتقادی
💠💠💠💠💠

مجید قلعه بیگی (فقیرخویی)

ظلم عرشه دایانوب داده یتیر یامهدی
ذوالفقار الده گل امداده یتیر یامهدی
  آغا گل گور نجه بیر عده نی طغیان ایلوری
   بو قَدَر ظلمی نه نصرانی مسلمان ایلوری



آغا گل کشور اسلامیده انسانلارا باخ
سنی زهرا بو ایکی اوزلی مسلمانلارا باخ
ایاق آلتوندا قالان شیعه ده وجدانلارا باخ
   چوخ سوزوم وار اوتانیر خامه الیمده آلیشیر
   بیزی ارشاد ایلینلرده یالاننان دانیشیر



گجه هیئتده اولور اشکی اوزوندن جاری
یاحسین سسلوری اما،اؤزون آل گفتاری
گینه رایجدی گونوز،رشوه ربا بازاری
   نیه عجّل فرجه فکری پراکنده ائدَخ
   چاغوراخ صاحب عصری اونی شرمنده ائدَخ



شیعه ی حیدر کرّار ریاست بولمز
تابع خط ولایت که خیانت بولمز
شهدا قانینه ارزش اولا غارت بولمز
    بیز منافقلره اؤلسقده مسلمان دئمَروخ
    اوللار دهریده علّامه ده انسان دئمروخ

آغا بیر عدّه گینه دعوی قدرت ایلوری
آدینی شیعه قویوب خلقه خیانت ایلوری
بیزه هر نیلوری او میز ریاست ایلوری
    شمری قاتل ایلدی بیر گجه ده، ری هوسی
   هله ده دهریده چوخ چوخدی او شخصین نوه سی



همان انسان تانوری یاخشی اوز همسایه سینی
قاپوسین بیر گجه دوگمور،ایشیدیر وای سسینی
چون حرامیله اکوبدور ایوینون پایه سینی
    او حرامیله دولان ثروتی طغیان ایلوری
   گوروسن ایلده نچه دفعه ده احسان ایلوری



هله وار تا نقدر دهریده تبعیض و ریا
دولانیم باشیوه عف ائیله بیزی،گلمه آغا
بوریوب دهری تملّق نه نیایش نه دعا
     بیری بیر آیدا گوروسن نچه میلیون آلوری
    بیرده گونده خجالت،باش اشاقه سالوری




سیندیرا بولمه دی اسلام بئلین قوم یهود
چپ باخانماز حرمه داعشیله آل سعود
بیز علی شیعه سیوخ،فاطمیوخ عبد ودود
   دلده یا فاطمه دور حرمینی گزروخ
    حرمه چپ باخانون بوینونی والله اَزروخ



سن دعا ائیله بیزه،باهم اولوب ال بیر اولاخ
داعئشین صفحهٔ تاریخیدن آدینده پوزاخ
مفتیِ پَست سعوده علوی سیلی ویراخ
   بیراولاخ آل سعودین آغا قبرین قازاروخ
     حجرالاسوده یا حضرت زهرا یازاروخ


آغاجان آنلامادیم عرض ایلدیم گلمه آغا
فرقتین شیعه نی دیلدن سالوب ای باب رجا
ذوالفقار الده اوزون گل،قوتولا ظلم و جفا
    درد دیلدی،آغا ظاهرده «فقیرین» سوزودی
    شیعهٔ آل علی عالمِ هستی گوزودی