آنامون رشده قزی امان گوزون آچ اویان اولورم باجی

احوالات شهادت امام حسن (ع)

آنامون رشده قزی امان     گوزون آچ اویان اولورم باجی

سنه دردیمی ایلیوم بیان    گوزون آچ اویان اولورم باجی

دو ویر ایندی برجه سسیمه سس  منه بیر داخی دادرس

اولورم باجی کسلور نفس     گوزون آچ اویان اولورم باجی

هله چوخ بلایه دوشر باشون  توکه سن عذاریوه قان یاشون

دو شهید اولور باجی قارداشون   گوزون آچ اویان اولورم باجی

دور علاج ایله منه خواهریم    دوتوب اود یانار دل مضطریم

باجی دوغرانوبدو جگرلریم  گوزون آچ اویان اولورم باجی

سولار ایندی گولشنمون گلی    دور ایاقه ای بوکولن بئلی

یخیلان ایوی داقلان ائلی    گوزون آچ اویان اولورم باجی

منه ظلم الیه اولوب ستم   چکن ای زمانه ده درد و غم

باجی دوغرانور جگریم بودم   گوزون آچ اویان اولورم باجی

بونه خوابدور گوزون آچ اویان   اولان ای زمانده باغریقان

دوتوب اودیانور باجی جسم و جان      گوزون آچ اویان اولورم باجی

گوزون آچ ایشیم اولوب آه و زار        کسولوبدو صبو گیدوب قرار

داخی قالمیوب باجیم اختیار             گوزون آچ اویان اولورم باجی

منی گربیله گوروب آغلاسان        باشیوه بو دم قره باغلاسان

اوزون اولدوروب سینه داغلاسان     گوزون آچ اویان اولورم باجی

ایله دلخونا بو غمی رقم

بوسوزی گتو دله دمبدم

بویوروب باجی شه محترم        گوزون آچ اویان اولورم باجی

 

 

یاندیم ای باجی سم-ی-زهریدن، قاره بخت اولان زینبیم اویان

ایمام حسن (ع) نوحه‌سی

قدرت اله نادری

 

یاندیم ای باجی سم-ی-زهریدن، قاره بخت اولان زینبیم اویان

جان وئریر گؤز آچ قارداشون حسن، اودلارا یانان زینبیم اویان

 

 

دورگینان نه غفلتده یاتمیسان، ییخدیلار باجی خانیمانیوی

تازه دن کینه یاسه باتمیسان، باغلی قویدولار دودمانیوی

دوغرانیب جیگر داده چاتمیسان؟ ائتدیله‌ر خزان گولسیتانیوی

زهر ائدیب منیم گؤر نئجه باجی قدیمی کمام زینبیم اویان

 

آچماسان گؤزون خواب-ی-نازیدن، درد - و- غم سنه برملا دگیل

ای بلا چکه‌ن راه حقیده بو بلا هله سون بلا دگیل

یئر مدینه دیر، جان وئره‌ن حسن قورخما ای باجی کربلا دگیل

یوخدو قدرتیم سسلییه‌م سنی، باغریم اولدو قان زینبیم اویان

 

یوخدو طاقه‌تیم نازیوی چکه‌م یاتما بیر بئله ای اسیر- ی- شام

یاندی دیل-دوداق دوغرانیب جیگه‌ر سنده منله قویما تک یانام

دور حسینیوی ایله باخبر، هارداسان حسین جان وئریر امام

ای جوانلاری الده دوغرانان خئیمه‌سی یانان زینبیم اویان

 

سو گتیر باجی سیل بو منزیلی، زهر- ی- کین دگیب گور لیباسیمه

دور تدارکی گؤر آنام باجی، قونشولار گله‌ر ایندی یاسیمه

آل-ی-هاشیمی گئت اویاتگیلان، وئر خبر باجب نازلی قاسیمه

دئ آتان اؤلور هارداسان بالا، قان حنا یاخان زینبیم اویان

 

آز قالیب گئجه؛ دان سؤکولسه گر، یاییلار باجی عالمه خبر

عون - و- جعفری، اکبری اویات، کوفه ناییبی مسلمه خبر

کربلا علمدارینی چاغیر، وئر منیم ابالفضلیمه خبر

قوم- و- قارداشیم سسله سن گله، گوللـه‌ری سولان زینبیم اویان

 

وقتیم آز قالیب ای آنام باجی، منله بیر زمان ائله گفتگو

دور چاغیر گؤروم اهل عیالیمی، ناتوان ائدیب چوخ منی عدو

دوغرانیب جیگر اؤلدورور منی، کوپه‌دن باجی ایچدیگیم بو سو

قارداشون گئدیر گل وداع قیل، بی خبر یاتان زینبیم اویان

 

نادری بو غم دفترین قوتار آز قالیب قلم دفتر آغلاسین

زهر-کین‌ایله‌ن جان وئریر حسن، وقت اولوبدو پیغمبر آغلاسین

فاطمه اوغول وای دئییب گله، باشینه ووروب حئیدر آغلاسین

کربلا غریبی حسینیمه سینه داغلییان زینبیم اویان